របៀប​ធ្វើ យ៉ាវហន ដោយ​ម៉ាដាំ សម្ផស្ស

យ៉ាវហន​នេះ​មើល​ទៅ​ប្រហាក់ប្រហែល​នឹង​ស៊ុប​ឆ្នាំងភ្លើង​ដទៃៗ​ទៀត​ដែរ តែ​មើល​គ្រឿង​ផ្សំ ដូចជា​ទំនង​ឆ្ងាញ់​ជាង​ស៊ុប​គោ​ធម្មតា ឯក​វិធី​ធ្វើ​ក៏​មិន​ពិបាក​ណាស់​ណា​ទេ ឲ្យ​តែ​អ្នក​ធ្លាប់​ធ្វើ​ស៊ុប​ពី​មុន​អាច​ធ្វើ​តាម​បាន ចំណែក​អ្នក​មិន​ដែល​ធ្វើ​ក៏​នៅ​តែ​អាច​តាម​បាន​ ព្រោះ​ក្បួន​ធ្វើ​មួយ​នេះ​លម្អិត​ណាស់។

*គ្រឿងផ្សំ​សម្រាប់​ធ្វើ​ទឹក​យ៉ាវហន (សម្រាប់មនុស្ស4នាក់) ៖

1- ទឹកស៊ុប​រម្ងាស់​ពីឆ្អឹងមាន់3-4L(របៀប​ធ្វើ​ទឹកស៊ុប រម្ងាស់​ចេញ​ពី​ឆ្អឹង​មាន់​គឺ​ដំបូង​យើង​យក​ឆ្នាំង​មក​ដាក់​ឆ្អឹង​មាន់​ឆៅ 2Kg ទឹក​ធម្មតា 6-8L ខ្ទឹម​បារាំង 1មើម ឆៃថាវ1មើម ប៉ិកួក1មើម ដើម​ខ្ទឹម​ខ្យល់​កន្លះ​ដើម ដើម​ឃិនឆាយ​ធំ​កន្លះ​ដើម អំបិល1ចឹប ម្រេចម៉ត់1ចឹប ដាំ​វា​ដោយ​ប្រើ​ភ្លើង​ខ្សោយៗ​ទុក​ឲ្យ​ពុះ​ចោល​រយ: 1-2ម៉ោង សឹម​ត្រង​យក​តែ​ទឹកថ្លា​ទុក​ប្រើ​ការ)

2- ទឹកដូង​ខ្ចី 1ផ្លែ
3- កាពិ​ឆៅ 1ស្លាបព្រាកាហ្វេ
4- ស្លឹកក្រូចសើច2សន្លឹកតូចៗ
5- ម្ទេស​ឆ្អើរ​លាង​ទឹក​វះ​យក​គ្រាប់​ចេញ 50g ស្ងោរ​ឲ្យ​ផុយ ពូត​ទឹក​ចេញ ចិញ្ច្រាំ​ឲ្យ​ម៉ត់ 40g
6- គ្រឿង​សាតេ 1កញ្ចប់
7- សណ្ដែកដី​លីង ញី​សម្បក​ចេញ បុក​ឲ្យ​ទក់ៗ
9- ខ្ទិះដូង 80g
10- ទឹក​ក្រូចឆ្មារ 1ផ្លែ
11- ប្រេងឆា 2ស្លាបព្រាបាយ
12- ខ្ទឹមស​ចិញ្ច្រាំ 1ស្លាបព្រាកាហ្វេ
13- ម្សៅស៊ុប​រ៉តឌី ឬខ្នរ1ស្លាបព្រាកាហ្វេ
14- ស្ករស 2ស្លាបព្រាបាយ
15- ទឹកត្រី 2ស្លាបព្រាបាយ
16- ត្រកួន 300g
17- ស្ពៃបូកគោ 300g
18- ភ្លៅកង្កែប 300g
19- ស្ពៃ​តឿ 200g
20- ផ្សិត​ដែល​ញាំ​បាន​គ្រប់​ប្រភេទ សរុប500g
21- សាច់គោ​ចំឡក​ក្នុង(សាច់​ផុយ) 300g
22- គ្រឿង​សមុទ្រ ដូចជា​បង្គា​ស្រស់ មឹក​ស្រស់ ខ្យង​ផ្លិត សុប300g
23- ពងមាន់​ឆៅ 1គ្រាប់
24- នំបញ្ចុកឬគុយទាវសរសៃធំឬបាញ់ហយ500g
25- ទឹកជ្រលក់​ទឹកត្រី​កោះកុង ឬ​ទឹក​តៅហ៊ូ ឬ​ទឹកសៀង មួយមុខ200g

**គ្រឿងផ្សំ​ទឹកត្រី​កោះកុង៖

1- ខ្ទឹមស 2ស្លាបព្រាបាយ
2- ខ្ទឹមក្រហម 2ស្លាបព្រាបាយ
3- ទឹកត្រី 5ស្លាបព្រាបាយ
4- ទឹកដូង​ខ្ចី​រសជាតិ​ផ្អែម ឬ​ទឹកស៊ុប​ក៏បាន 2-3ចានចង្កឹះ 
5- ទឹកក្រូច​ឆ្មារ 5ស្លាបព្រាបាយ
6- ទឹកខ្មេះ តិចតួច
7- ស្ករស 5-6ស្លាបព្រាបាយ
8- ម្សៅស៊ុប​រ៉តឌី ឬ​ខ្នរ 1ស្លាបព្រាកាហ្វេ
9- ម្ទេស​ហ៊ឹ 4-5គ្រាប់
10- អំបិល​ម៉ត់ 1ចឹប
11- ទឹកម្ទេស​ផ្អែម​ដប​របស់​ថៃ Thai sweet chili sauce 1ស្លាបព្រាបាយ
12- ឫស​និង​ស្លឹកជីវ៉ាន់ស៊ុយចិញ្ច្រាំ1ស្លាបព្រា បាយ
13- វិធី​ធ្វើ​គឺ​យក​គ្រឿង​ទាំងអស់​ដាក់​ចូល​ក្នុង​ម៉ាស៊ីន​កិន រួច​កិន​វា​ឲ្យ​ម៉ត់​សឹម​ភ្លក្ស​​ថែម​ថយ​រសជាតិ​តាម​ចំណូលចិត្ត។

***គ្រឿងផ្សំ​ទឹក​តៅហ៊ូ៖

1- តៅហ៊ូ​កែវ(ភាសា​ចុងភៅ​ហៅថា​តៅហ៊ូ ស្អុយ)2ស្លាបព្រាបាយ
2- ខ្ទឹមស​ចិញ្ច្រាំ 1ស្លាបព្រាកាហ្វេ
3- ប្រេងឆា 2ស្លាបព្រាបាយ
4- ទឹកដោះគោឆៅ 3ស្លាបព្រាបាយ
5- ស្ករស4-5ស្លាបព្រាបាយ
6- ទឹកក្រូចឆ្មារ1ស្លាបព្រាកាហ្វេ(ដាក់​ក៏​បាន មិន​ដាក់​ក៏​បាន)
7- ទឹកស៊ុប​រម្ងាស់​ពី​ឆ្អឹង​មាន់ 3ស្លាបព្រាបាយ
8- វិធី​ធ្វើ​គឺ​យើង​យក​គ្រឿង​ទាំងអស់​ឆា​ចូល​គ្នា ឲ្យ​ឈ្ងុយ​រលាយ​សាច់​មួយ​សឹម​ភ្លក្ស​មើល​ថែមថយ​រសជាតិ​តាម​ចំណូលចិត្ត។

****គ្រឿងផ្សំ​ទឹកសៀង៖

1- ទឹកសៀង​ផ្អែម Hoisin sauce 1ចានចង្កឹះ
2- ខ្ទឹមស​ចិញ្ច្រាំ 1ស្លាបព្រាបាយ
3- ប្រេងឆា 2ស្លាបព្រាបាយ
4- ស្ករស 1ស្លាបព្រាបាយ
5- ម្សៅស៊ុប​រ៉តឌី ឬ ខ្នរ កន្លះ​ស្លាបព្រាកាហ្វេ
6- ទឹក​ប្រេងខ្យង កន្លះ​ស្លាបព្រាកាហ្វេ
7- ទឹក​ប្រេងល្ង 1ស្លាបព្រាកាហ្វេ
8- គ្រាប់​ល្ងស​លីង​ឲ្យ​ឈ្ងុយ 1ចឹប
9- ទឹកស៊ុបរម្ងាស់ពីឆ្អឹងមាន់3-4ស្លាបព្រាបាយ
10- ទឹក​ក្រូចឆ្មារ(ដាក់​ក៏​បាន មិន​ដាក់​ក៏​បាន)
12- វិធី​ធ្វើ​គឺ​យើង​យក​គ្រឿង​ទាំងអស់​ឆា​ចូលគ្នា​ឲ្យ​ឈ្ងុយ​រលាយ​សាច់​មួយ សឹម​ភ្លក្ស​មើល​ថែម​ថយ​រសជាតិ​តាម​ចំណូលចិត្ត រីឯ​ល្ងស​លីង​ចាំ​រោយ​តាម​ក្រោយ។

*****វិធី​ធ្វើ​យ៉ាវហន៖

1- ដំបូង​យក​សាច់​ទាំងអស់​មក​លាង បក កាត់ ហាន់​រួច​តម្រៀប​ដាក់​ចាន​ឲ្យ​ស្អាត​យក​ទៅ​ក្លាសេ​ក្នុង​ទូរ​ត្រជាក់​សិន។

2- យក​បន្លែ​មក​ចិត​កាត់​បក​លាង​ទឹក​សម្អាត​ឲ្យ ស្អាត​ទុក​ឲ្យ​ស្រស់ទឹក​រួច​យក​វា​ទៅ​តម្រៀប​ក្នុង​ចាន ថាស ឬ​កញ្ច្រែង​ទុក​មួយ​ឡែក​សិន។

3- ដាំ​ខ្ទះ​ឲ្យ​ក្តៅ​ចាក់​ប្រេង​ឆា​ចូល​ដាក់​ស្លឹក​ក្រូចសើច ដាក់​ខ្ទឹមស​ចិញ្ច្រាំ កាពិ ម្ទេស​ឆ្អើរ​ចិញ្ច្រាំ គ្រឿង​សាតេ​ឆា​ឲ្យ​ឈ្ងុយ​ចូល​គ្នា សឹម​ដាក់​ម្សៅស៊ុប​ខ្នរ ឬរ៉តឌី​ទឹកត្រី​ស្ករស​ខ្ទិះដូង​ទឹក​ដូង​ទឹក​ស៊ុប​រម្ងាស់​ចេញ​ពី​ឆ្អឹង​មាន់​កូរ​វា​បន្តិច​សឹម​បន្ថយ​ភ្លើង​ឲ្យ​តូច​ល្មម​ទុក​ឲ្យ​វា​ពុះ​ដាក់​ទឹក​ក្រូចឆ្មារ​ចូល​រោយ​សណ្ដែកដី​លីង​ចូល​សឹម​ភ្លក្ស​មើល​ថែម​ថយ​រសជាតិ​តាម​ចំណូលចិត្ត ។

4- ផ្ទេរ​ទឹក​យ៉ាវហន​ចូល​ឆ្នាំង​ស៊ុប​ថ្មី ឬ​ខ្ទះ​ថ្មី ដាក់​វា​លើ​ចង្ក្រាន​ហ្គាស៍​តូច បើក​ភ្លើង​តិចៗ ដាក់​បន្លែ​និង​សាច់​គ្រប់​ប្រភេទ​ចូល​ម្តង​បន្តិចៗ(បើ​សាច់គោ​យើង​ច្របល់​ជាមួយ​ពងមាន់​ឆៅ​ឲ្យ​ហើយ)ហើយ​ចាប់​វា​ញ៉ាំ​ក្តៅៗ​ដូច​យើង​ញ៉ាំ​ស៊ុបស៊ូគី​ដែរ ផ្ទាប់​ជាមួយ​នំបញ្ចុក​គុយទាវ​សរសៃ​ធំ ឬ​បាញ់​ហយ​ហើយ​ជ្រលក់​ជាមួយ​ទឹកត្រី​កោះកុង​ក៏បាន​ទឹក​តៅហ៊ូ​ក៏​បាន​ទឹកសៀង​ក៏​បាន​តាម​ចំណូលចិត្ត។

******សម្គាល់៖ លោកអ្នក​អាច​បន្ថយ​បរិមាណ បន្លែ​សាច់​និង​គ្រឿង​បាន​ទាំងអស់​តែ​រសជាតិ​នឹង​ថយ​ដូចគ្នា។

___________________
ដោយ​ម៉ាដាម សម្ផស្ស